1SPORT

ტურინის იუვენტუსის მეკარე ჯანლუიჯი ბუფონი, რომელსაც 28 იანვარს 43 წელი შეუსრულდება, კარიერის დასრულებას არ აპირებს. როგორც იტალიელი ჟურნალისტები წერენ, ლეგენდარული მეკარე ტურინულ კლუბთან ხელშეკრულების გახანგრძლივებას, რომელიც 2021 წლის ზაფხულში იწურება, კიდევ ერთი სეზონით აპირებს.
როგორც ირკვევა, ჯიჯი ბუფონის მიზანია, გახდეს სერია A-ს ისტორიაში ყველაზე ასაკიანი ფეხბურთელი, რომელიც მოედანზე გასულა. ამ დროისთვის ეს რეკორდი ლაციოს ყოფილ მეკარეს, მარკო ბალოტას ეკუთვნის, რომელმაც თავისი უკანასკნელი მატჩი იტალიის ჩემპიონატში 2008 წელს, 44 წლისა და 38 დღის ასაკში ჩაატარა. 
და აქ საქმე მხოლოდ სერია A-ს რეკორდს არ ეხება. მარკო ბალოტას ანალოგიური რეკორდი უეფას ჩემპიონთა ლიგაშიც ეკუთვნის, სადაც ბოლოს 2007 წლის 11 დეკემბერს, მადრიდის რეალის წინააღმდეგ ითამაშა და მატჩის დღეს 43 წლისა და 252 დღის იყო. შესაბამისად, ჯიჯის შანსი აქვს, ევროპის უმთავრესი საკლუბო ტურნირის რეკორდიც დაისაკუთროს.

შეგახსენებთ, რომ ბუფონს უკვე ეკუთვნის რეკორდი იტალიის ჩემპიონატში ჩატარებული მატჩების რაოდენობით. მის ანგარიშზე 654 შეხვედრაა. 
ბუფონს სერია A-ში დებიუტი 1995 წელს, პარმას მაისურით ჰქონდა. 2001 წელს ის იუვენტუსში გადაბარგდა, რომლის რიგებშიც ქვეყნის ჩემპიონი 10-ჯერ გახდა. ჯიჯიმ იუვეს რიგებში ჯამში 677 შეხვედრა ჩაატარა, პარმაში - 220. კიდევ 176 მატჩში მან იტალიის ეროვნული ნაკრების ღირსება დაიცვა. მეკარემ ერთი სეზონი პარი სენ-ჟერმენშიც გაატარა.

მიმდინარე სეზონში ვეტერანმა იტალიელმა მეკარემ იუვენტუსის კარი ყველა ტურნირის 6 შეხვედრაში დაიცვა და 4 გოლი გაუშვა. [xfgiven_embed] [/xfgiven_embed]